FEDERACION ESPAÑOLA DE MUNICIPIOS Y PROVINCIAS
Aberta a convocatoria de axudas do FSE para 2011
O BOE do 23 de febreiro publicou a convocatoria de axudas do Fondo Social Europeo deste ano, un total de 81,58 millóns de euros que se destinarán a fomentar no noso país "pactos, redes, asociacións e apoio ás iniciativas locais de emprego e a inclusión social, tendo en conta a perspectiva de xénero".
A axuda virá a reforzar a cooperación económica do Estado coas Entidades Locais, coa finalidade de fomentar iniciativas e actividades que respondan a necesidades locais xeradoras de emprego -en particular, no sector servizos de atención a discapacitados ou a persoas en risco de exclusión social para favorecer a integración e non discriminación-; tamén reforza a cooperación Estado-Entidades Locais no que respecta a promover a elaboración de procesos de concertación e consenso para formular pactos locais de emprego, e no relativo a impulsar a elaboración de estudos de prospección de necesidades potenciais en materia de formación para o emprego que favorezan a adopción de "estratexias integradoras dentro do ámbito local considerado".
As accións cofinanciadas que se contemplan na convocatoria son os itinerarios integrados de inserción sociolaboral dirixidos, por unha parte, a ofrecer aos demandantes de emprego unha oportunidade de práctica profesional con formación específica axeitada en materia de prestación dos servizos de atención mencionados; e por outra ofrecer similar oportunidade aos demandantes de emprego con especiais dificultades para a súa inserción no mercado de traballo -menores de 30, maiores de 45, parados de longa duración-.
Outras accións cofinanciadas con cargo a este Fondo son as de apoio ao establecemento de pactos locais polo emprego, pactos que deberán incluír necesariamente a unha ou varias Entidades Locais, e a axentes económicos e sociais representativos do territorio, coordinados por unha Entidade Local.
