FEDERACION ESPAÑOLA DE MUNICIPIOS Y PROVINCIAS
A descentralización a debate en VI Foro Iberoamericano de Gobernos Locais
Máis de 120 responsables locais de toda Iberoamérica debateron durante tres xornadas sobre gobernabilidade local, descentralización e reforma do Estado no marco do VI Foro Iberoamericano de Gobernos Locais, que se clausurou o 29 de setembro en Asunción (Paraguai). A descentralización e o goberno multinivel mostráronse, a xuízo dos asistentes, como factores fundamentais no actual momento de crise económica mundial.
O traballo dos participantes quedou recollido nunha Declaración final na que, ademais, se incide na importancia dun bo modelo de goberno que inclúa a estreita colaboración entre as diferentes esferas e niveis dos Gobernos de cada un dos Estados Nacionais nos procesos de elaboración e aplicación de políticas públicas.
O traballo organizouse en catro mesas nas que se abordou a necesidade de avanzar na transparencia e ética institucional na xestión municipal; a busca de novas fórmulas de cooperación público privada que favorezan a cohesión territorial e social; o establecemento de mecanismos que faciliten a cooperación interadministrativa entre os distintos niveis de goberno; e avanzar na definición dunha folla de ruta que permita avanzar cara a un diálogo permanente entre o Foro e o Sistema de Cumios, co obxectivo de impulsar o recoñecemento da Carta Iberoamericana de Autonomía Local.
A FEMP estivo representada por unha delegación que integraron o Alcalde de Valladolid, Javier León de la Riva; o Alcalde de Lugo, José López Orozco; o Tenente de Alcalde de Cádiz, Juan José Ortiz Quevedo, e o representante da Deputación de Barcelona, Jaume Borrel.
O Alcalde de Valladolid interveu no acto de clausura e destacou que os gobernos locais elixidos democraticamente teñen o dereito e o deber de aspirar a un espazo propio de xestión dos asuntos públicos, a que este sexa respectado e recoñecido polas institucións públicas, e amparado nas constitucións ou normas fundamentais dos estados.
No acto de clausura tamén se anunciou a designación de Madrid como cidade anfitriona do VII Foro Iberoamericano de Gobernos Locais, que se celebrará o próximo ano
