FEDERACION ESPAÑOLA DE MUNICIPIOS Y PROVINCIAS
Manuel Chavesek UN-Habitat saria jaso du 2009ko Tokiko Inbertsio Funtsagatik FEMPen
Manuel Chaves Gobernuko hirugarren presidenteordeak Nazio Batuen Giza Kokalekuetako Habitat programaren 2010eko ohorezko sarien aipamen berezia jaso du FEMPen. Sari honek landaguneetan bizi-kalitatea hobetzeko eta hiri iraunkorragoak lortzeko ekarpen handiena egin duten ekimenak saritzen ditu.
Lurralde Politika eta Administrazio Publikoko ministroak toki-gobernu guztiekin partekatu du saria. Hala, sariak FEMPen egoitzan banatzea nahi izan du, federazio honek Espainiako udalerrietan FEIL 2009 aplikatzeko egindako lana errekonozitzeko. UN-Habitat programaren zuzendariak, Joan Closek, eman dio saria Manuel Chavesi.
Alor honetan nazioartean sona handiena duen saria da eta Espainiako Gobernuaren ekimen honen balioa aintzatesten du. Toki-gobernuen alde Espainiak demokrazia-garaian mugiarazi duen bitarteko publiko kopuru handiena izan da: 8.000 milioi euro. FEIL 2009k, orotara, udalek betearazitako 30.700 proiektu finantzatu ditu, eta 420.000 lanpostu baino gehiago sortu ditu.
Hirugarren presidenteordeak NBEk ematen dituen sarietako aipamen berezia eskertu du, eta gogorarazi du Gobernuaren FEIL ekimena Espainiako herri eta hirien bizi-kalitatea hobetzeko izan dela. Chavesen hitzetan, ekimenari esker, 1.400 ikastetxe eta kultur zentro baino gehiago eraiki dira, 140 haur-eskola baino gehiago, baita oinarrizko zerbitzuetako 1.000 ekipamendu eta azpiegitura ere, ur-saneamendua eta hondakinak birziklatzekoak barne. Horrez gain, espazio publikoak birgaitzea lortu dute, oztopo arkitektonikoak ezabatu dira, naturguneak hobetu dira eta ondare historikoa zaindu da.
Chavesek nabarmendu zuen 2010eko Enplegu eta Iraunkortasunerako Estatu Funtsa FEIL 2009ren emaitza onei esker, orain saria jaso dutenei esker, sortu zutela, eta 5.000 milioiko inbertsioa egin dutela: «Bi urtean 61.000 proiektu baino gehiago kudeatu dira, 13.000 milioi euro baino gehiagokoak; horiei esker, gure hiriak eta herriak erabat eraldatu ditugu».
FEMPen presidente Pedro Castrok, halaber, Manuel Chavesi eskerrak eman zizkion 8.116 udalerrien izenean toki-gobernuetan eta beren erantzukizunean jarritako konfiantzagatik, baita dinamizatzaile sozial eta ekonomiko gisa duten gaitasunean konfiantza ipintzeagatik ere. Era berean, Funts honetako bitartekoak eztabaidaezintzat jo zituen enplegua sortzen laguntzeko, ekonomia estimulatzeko eta Espainiako hiri eta herrietan bizi-kalitatea hobetzeko.
Getafeko alkateak alkate eta udal-gobernuetako talde guztiei eskerrak eman zizkien, Funtsak arrakasta izan dezan egindako lanagatik, eta, batez ere, beren «profesionaltasunagatik, inplikazioagatik eta arduragatik».
